CSV-Fraktion careers and jobs

D’CSV – eng Wäertepartei fir eng gerecht Gesellschaft

Mir sinn déi grouss Lëtzebuerger Vollekspartei vun der sozialer Mëtt.

Jidder eenzelen zielt …

Eis Politik baséiert op de Grondprinzipie vun der chrëschtlecher Sozialléier. Si baséiert um Leitmotiv vu „Jidder eenzelen zielt“.

… als eenzele Mënsch

Esou steet d‘Wäertschätzung vun der mënschlecher Dignitéit am Mëttelpunkt vun eise Bestriewungen. All Mënsch soll d’Méiglechkeet hunn sech eng eegen Existenz opzebauen. All Mënsch huet virun allem d’Recht sech am Liewen ze verwierklechen.

Den eenzele Mënsch kann sech awer nëmme richteg bannent enger Gemeinschaft entwéckelen. Mir kënnen eis Ziler am Beschten zesummen areechen. Wa mir eis géigesäiteg hëllefen an ënnerstëtzen. Mir sti fest zur Solidargemeinschaft.

… als aktiven a wäertvolle Member vun der Gesellschaft

Mir gleewen dorun, datt jiddereen e Bäitrag fir eist Zesummeliewen erbrénge soll a kann. Déi staark Schëlleren natierlech méi, ewéi déi schwaach. Sozialen Zesummenhalt, Sécherheet a gemeinsame Wuelstand, ewéi déi modernsten ëffentlech Infrastrukturen an Déngschtleeschtungen, verlaange vun eis all Ustrengungen. Eis Gemeinschaft an eis fräi Gesellschaft kënnen op Dauer ouni d’Bäiträg vun all Mënsch, ouni d’Upake vu jidderengem, net bestoen.

D’Zesummeliewe soll awer jidderengem méi Méiglechkeeten a méi Fräiheete bidden, net den Eenzelen ënnerdrécken an aschränken. Dofir ass et un éischter Plaz net de Staat, ma jidderee vun eis, dee fir säi Wuel an dat vu senge Matmënsche verantwortlech ass.

Mir stinn dofir fir d’Zesummespill vun Eegeninitiativ a kollektiven Ustrengungen, vum Leeschtungsgedanken an der sozialer Gerechtegkeet a fir d’Matenee vu Fräiheet vum Individuum a Verantwortung fir d’Allgemengwuel.